أتى العامل متأخراً بعد صلاة التراويح , سألته عن السبب , فأخبرني أنه كان يبحث عن (الشِبْشِبْ) بعد الصلاة , فلم يجده.."ده خامس شبشب يروح مني من أول رمضان"..
فأخذ (شبشب) مركون في حمام الجامع , وعاد به..
"ده حتى آخر شبشب راح , كان بتاع جامع تاني"
سألته : "هم الحرامية دول بيصلوا معاكم , ولا جايين منين بالظبط؟!"
قال : "أيوة , تلاقيهم بيصلوا وبيطلعوا في نص الصلاة كدة , أو مع التشهد , الواحد منهم يجري برة على طول , ويلبس أنضف جزمة يلاقيها في وشه"
واسيته على فقيده بجملة قصيرة , فأخبرني أن (الشبشب) الذي يرتديه الآن أفضل من المسروق!
"ده حتى كان مقطوع , وبمشي أشح بيه ع الأرض , لو بعته مايجيبش جوز جنيهات!"
سألت : "ومين ده اللي يسرق شبشب كدة؟"
قال : "أكيد واحد حافي"!
ضحكت.. ثم قال : "أنا فاكر تالت يوم رمضان , سبعة وقفوا على باب الجامع يسبوا الدين , عشان جزمهم اِتسرقت.. منهم واحد كان جايب كاوتش بــ 300 جنيه.. بس ده حلال فيه السرقة , أصل اللي يجيب كاوتش بمرتب شهرين ليا.. يبقى أكيد حرامي!"
اِبتسمت , ثم سألته : "على كدة حرامي الجزم ده , وهو بيصلي.. بيقعد يدعي ربنا يسامحه؟"
قال : "لا يا بيه.. ده بيدعيه إنه يلاقي جزمة نضيفة برة!"
......................
هناك 3 تعليقات:
like :)
حلوة :)))
حلوة اوي ..
:)
عجبتني جداً ..
إرسال تعليق