ممكن أدلك على جرحي؟
بشرط تداويني
تحيي ابتسامة فوق شفايفي
دهشة
نايمة على جبيني
...
أنا مثلا في الضلمة
بنور بالموبايل أبو شرطتين
عشان أشوف سلك الشاحن
اللي هشحنه بيه حبتين
فمش بعيد أشاورلك على حلمي
اللي بقى دمعتين
....
جايز اكون ميت ومش داري..
من سنين
نفسه يحلم..
بفرح ..بأمل ..بحياة
بثورة ..بوطن.. بنجاة
إنشالله لمدة ثانيتين
.....
مش أنا وحدي اللي كدة
إحنا ملايين
حوالي 80 مليون مسكين
منهم ناس شقيانة وعرقانين
وناس زي عز وأبو العينين
ممثلات وممثلين
رقاصات ونصابين
حرامية ومرتشين
صحفي حكومة
صحفي بوشين
شعب مطنش
تنابلة مثقفين
الباب يخبط اقول أنا مين
يطلع ظابط او حتة أمين
ادخلوها بسلام آمنين
وادي دقني ان كنتوا منها طالعين
....
حكمة وقالوها الفاهمين
ابن الوز هيغرق بلد ما بين البحرين
لا هو عوام
ولا كان ابوه
ولا اللي كان قبله
....
عالم محدثين نعمة
ربك تاب عليهم م الشقا
بعد ما كانوا جربانين
.................
2 تعليقات:
مــــــــــــــــــمكــــــــــــن
(لو بطلنا نحلم نموت)
هايل يأحمد....... برافو بجد
إرسال تعليق