محتوى المدونة لا يناسب من تقل أعمارهم عن 17 سنة !! (مش أنا اللي بقول)

OnePlusYou Quizzes and Widgets

Created by OnePlusYou - Free Dating Sites

سـِفـْرْ عـَاشـُوريات

02‏/01‏/2011

دليلك لكي تعيش مسيحياً في مصر..

عندما تريد أن تذهب إلى الكنيسة.. فلا تخبر سائق التاكس بالكنيسة الفلانية.. حتى لا يضللك إن كنت لا تعلم العنوان جيداً.. أخبره بأقرب مكان مميز قرب الكنيسة..
...............................
لو كنت مصاباً بالصداع, وسواق التاكس أو المكروباص مشغل قرآن بصوت حمار بينهـّق.. فلا تخبره بدينك عندما تطلب منه ذلك.. ويـُفضـَل مداراة معصمك إن كان عليه صليب واضح.. حتى لا يكون رد فعل السائق أن يرفع من هذا الصوت المزعج أكثر حتى لو أقسمت له أن رأسك سينفجر..
...........................
مالكش دعوة بأي مشكلة إسلامية بتحصل في البلد حتى لو لها عواقب اجتماعية تتعلق بالوطن.. فأنت في النهاية مسيحي..
(عندك واحدة محسوبة على المثقفين زي "صافي ناز كاظم" اتضايقت أوي أوي أوي عشان "يوسف شاهين" أدلى برأيه في قضية الحجاب)..
...........................
اوعى تعمل فيها ناصح وبتعرف تخمن ما يـُقال عليك وإلا هتعيش في جنون اِضطهاد مش هيخلص..
انت عارف طبعاً ان كل المسلمين بينهم وبين بعض بيفاضلوا بعض عليك.. "بقى يا راجل.. تشغل المسيحي وتسيب المسلم؟؟".. "مارضيتش أديله بقشيش.. أصله مسيحي".. حتى لو كنت محترم معاهم لأقصى درجة هيبقى آخرك عندهم.. "والله هو كويس.. بس مش عارف أنا حاسس إنه بيتخابث" أو "هو طيب جداً.. بس لو يأسلم"..
..........................
اِسمع وطنش..حين يخبروك بــ القساوسة دول واكلينها والعة.. بيقبضوا من أمريكا.. ومعاهم فلوس كتييييييييير.. وبيصرفوا ع الناس عشان يتنصروا وينصروا.. وجوة الكنايس كله بينام مع كله.. بس بالراحة وبهدوء عشان فيه مستودع للذخيرة والقنابل.. وكمان فيه أسود ونمور.. ويمكن طائر الرخ.. ولا تطلب أن تكون المعاملة بالمثل.. اتجننت إنت عشان تفكر تنتقد شيوخ؟؟؟
..........................
يجب أن تقاوم التنصير.. وتؤيد الدعوة الإسلامية..
..........................
عندما تذهب لموظف حكومة من أجل إمضاء أو ختم.. يا ريت تحني رقبتك عشان كمان مش هيبقى اِسمك "مايكل" أو "جرجس" وراسك مرفوعة لفوق.. المفروض تتكسف على دمك يعني.. عشان ورقك يخلص..
...........................
تقبل وجود وزير أو اتنين أو تلاتة مسيحيين في الحكومة عشان يعملوا منظر يعني.. بغض النظر عن الكفاءة وخلافه..
.........................
يجب أن تكون مقتنعاً أنك تعبد دين باطل.. فكل المسيحيين -بل كل من هم على دين غيرالإسلام- يعرفون ان الإسلام هو الدين الصح.. ألم تستشعر الإعجاز في "كهعيص"؟؟..
..........................
عندما تنجب.. ستضطر أن تطلق على أبنائك أسماءً مشتركة.. عادل, مدحت, مراد.. وخمن بعد ذلك نظرات الناس إلى أبنائك وهم يريدوا أن يسألوهم عن الاسم الثاني ثم الثالث.. وربما تصل لصراحة وقحة: دينك ايه يعني؟؟؟
........................
عندما تموت منفجراً لأشلاء.. فحاول أن تحافظ على فمك كاملاً مبتسماً.. حتى لا يـُفهم من تكشيرتك أثناء موتك أن هناك فتنة طائفية.. ويفضل أن تؤجل موتك لثوانِ لتكتب بدمك أن الموساد والهكسوس هم من فعلوا هذا بك..
.........................
عندما تقيم قرب مسجد.. يتردد فيه صوت المؤذن بآيات -انتهى حكمها بلا رجعة- على شاكلة "حتى يدفعوا الجزية عن يد وهم صاغرون".. أو خطب طائفية حولك وقومك ونسائك.. فيمكنك الآن أن تستنشق نفساً هائلاً من الهواء إن لم يكن قد كتمه صوت الإمام.. وحاول أن تبتسم..
......................
عندما يتم اضهادك في عملك لأنك مسيحي أو تفجيرك أمام كنيستك لأنك مسيحي أو الاعتراض على بناء كنيسة في شارعك من قبل مسلمين.. قد تؤدي تلك الكنيسة إلى زوال الإسلام للأبد.. فلا تنسى كلام أشقائك في الوطن.. أن المسيحيين بقت ايديهم طايلة في البلد, وافتروا خلاص.. حاول تقتنع إنك إنت المفتري.. (جرب كدة وقول أنا مفتري 10 مرات وشوف النتيجة)
.....................
لازم تترحم على اللي المسيحيين اللي ماتوا في الفتن الطائفية وتقول زي ما بيقول إخواتك وحبايبك في الوطن: أنا ضد قتلهم عشان كان قدامهم الفرصة يموتوا مسلمين.. (عايز عدل وتسامح أكتر من كدة يا مفتري؟؟؟؟)
....................
يجب عليك أن تحترم صيام المسلمين في نهار رمضان.. بعدم تناول شيء أمامهم.. ولا تطلب منهم أن يكون الاحترام متبادل في أوقات صيامكم.. فلا أحد يذكر متى تصوموا على أي حال.. لأننا دولة إسلامية.. وكذلك يجب أن تحترمهم حين يسبوا دينك.. أو يكفروك..
......................
عندما يدعوك أحد المسلمين إلى دينه.. دين الحق المكتوب على صفحة السما إنه هيكسب معانا بإذن الله.. فحاول أن تدخل دينه لكي تسلم من شره أو غباء اللي خلفوه.. وإن لم تستطع فيمكنك أن تخبره.. "أنا عارف يا مولانا إني بعبد دين باطل.. بس الشيطان!"
...........................
عندما يطلب مسلم يد ابنتك لكي يتزوجها -أو الأصح أن ينكحها- فيجب أن تقبل هذا.. لأنه من شرع الإسلام.. لكن هذا لن يغير من حقيقة أنك كافر.. لأنه يحق لنا نحن المسلمين أن نظفر بنسائكم لكن لا العكس طبعاً..
.........................
لا تضاجع عاهرة مسلمة.. كيف يمكن لقضيبك القبطي أن تسول له نفسه أن ينكح فرج مسلم؟؟؟ ولو لعاهرة شريفة لا تضاجع إلا المسلمين؟؟
..........................
مع مرور الأيام ستكتسب برود وبساطة وتبلد.. إن اِتبعت هذه النصائح.. فلا تجعل المسلمين حين يسخرون منك على إنك ماعندكش شخصية إنك تفكر تغير شخصيتك.. خليك زي ما انت .. انت في دولة إسلامية خليك فاكر!
..........................
أنت لن تسافر إلى المريخ.. لذلك يمكنك أن تستمتع بالكائنات الفضائية السلفية.. كأنهم وحوشاً يمكن ترويضهم بكلمة بسيطة.. حتى تأمن نباحهم وعضهم..
...............................
حين يقتلون أقربائك في الكنائس أو غيرها.. وحين تحدث مشاجرات حول فلانة الفلانية التي وقفت على حبل بين الإسلام والمسيحية.. وكل طائفة تجذب فيها "لأ ديه بتاعتي.. لأ ديه بتاعتي".. فيمكنك أن تعتبر هذا ابتلاء وتردد آيات من إنجيلك وتبتسم..
..............................
لو مسلم سب لك الدين وقطعلك الإنجيل.. اوعى تتجنن وتروح تشتكي في الشرطة.. انت بس تسامحه وخلاص.. وماتنساش للمرة المليون إنك في دولة إسلامية..
...............................
لما تلاقي إخوان مسلمين مترشحين في كل حتة بيقنعوك أنهم هيظبطوك أحسن من الحزب الوطني.. فبلاش تبقى سيء الظن في تفسير كلمة تظبيط.. قوم ,و ادي صوتك للإخوان.. عشان المسلمين يقولوا عليك مسيحي حيادي وعقلاني.. والمسيحي الحيادي العقلاني عند المسلم هو المسيحي اللي مش بيحب دينه.. وبينافق المسلمين.. حاول تكون منافق..
...............................
عندما تقابل نظرة قرف أو اِزدراء من شخص مسلم حين تخبره أنك مسيحي.. فيجب أن تغفر له هذا.. فأنت بكلمة مسيحي.. كأنك تقول أنا لا أؤمن برسالة محمد.. وبالتالي سيفهم من ذلك أنك ترى رسول الإسلام كاذب.. أنت الآن تتهم أفضل شخص عنده بالكذب بمجرد أن تقول إنك مسيحي.. فتقبل ما يحدث لك.. أخبره أنك مختلف وكفى!
........................
في النهاية.. يجب أن تكون مؤمناً أنك في وطن حر.. دولة مدنية.. قائمة على الوحدة الوطنية.. وماتنساش يا حبيبي إن البلد بلدك.. وحقوقك فيها زي حقوق المسلمين بالظبط ويمكن أكتر.. وماتقولش ايه اديتنا مصر وقول هندي ايه مصر.. وختامه..

..........................
مريام فكري.. قبل 5 ساعات من تحويلها لأشلاء أمام كنيسة القديسين بالأسكندرية.. كتبت على فيسبوك: 2010 انتهت, هذا العام يحمل أجمل ذكريات حياتي.. أنا فعلاً استمتعت بهذا العام.. آمل أن تكون 2011 أفضل كثيراً.. فلدي الكثير من الأمنيات في السنة الجديدة.. آمل أن تتحقق كلها.. من فضلك يا إلهي كن بجانبي وساعدني على تحقيق كل طموحاتي على أكمل وجه :)
.....................................

هناك 22 تعليقًا:

آخر أيام الخريف يقول...

شفت بروفايل مريم الصبح و عيطت عليها زى ما تكون من اهلى :(

للأسف معاك حق فى كل اللى بتقوله ... انا بجد مش عارف الناس المتعصبة دى بتطيق نفسها ازاى :((((

محمد عمرو يقول...

ده قمة التطرف !! ... أنا مسلم بتذل برده لما أجي أطَلع أي ورقة رسمية ... ساعتها بنتقد الروتين والحكومة .. إنت بتنتقد التفرقة العنصرية

وانا راكب عربيتي واحد بيطلع يسيبلي الدين ... مش بقول إنه قال كده عشان شاف مصحف في عربيتي .. بقول إنه ملقاش حد يربيه وإنه صايع

مش حقولك ده شعور بالإضطهاد .. مش حطلب منك أكتر من إنك تحط فالاخر إن ده رايك إنت بس ... مش رأي مسيحيين مصر

مش رأي صحابي اللي بدخل معاهم الكنيسة لما يبقى فيه عزاء حد منهم ... أو فرح حد منهم

مش رأي الناس اللي عاشوا مع بعد سنين في نفس البيت .. كل واحد فيهم عنده دين غير التاني

مش رأي الناس اللي عشت معاهم عمري كله في المدراسة ...

مش رأي البيوت الكتيرة اللي فيها اب وأم مسلمين وخال أو عم مسيحي ...

للاسف مقالتك ملهاش أي فايدة ...

لانها مبنية على قمتين غلط ... التعميم والشعور بالاضطهاد

كلنا عارفين إن مهنة المحامي مهنة فيه كتير قوي كذب وتحايل عالقانون ورشوة .... ينفع نقول {كل المحامين حرامية} {وكل المهندسين شرفاء}

إنت بتنتقد المتطرفين "اللي مش حقولك إنهم مش موجودين" بتنتقدهم بـاسلوب متطرف !!

على فكرة أنا مش بقول إنك غلط فكل كلامك ... بالعكس فيه حاجات أنا نفسي شايف إنها غلط وبزعل لما بحط نفسي مكانك , أهم حاجة إنك تبقى مؤثر ... تعرف توصل صوتك صح وتاخد حقك صح

لما يجي وقت زي ده كلنا لازم نقف فييه مع بعد ... وإنت تكتب كده تبقى غلطان .... لما للأسف تتريق على ايه من ايات القرآن تبقى غلطان .. زي اللي بيتريق عاللغة الصينية وهو مش فهمها ولا فاهم الناس دول بيقولوا إيه ..

فكَّر بـعقلك شوية .. اعرف إن مقالتك ديه تعمل فتنة أكتر من 20 أغنية عن الوحدة ... و 30 مقالة عن الوطنية

محمد عمرو يقول...

أرجو إنك يبقى عندك الشجاعة تنشر الرأي الاخر ... شكرا


ده قمة التطرف !! ... أنا مسلم بتذل برده لما أجي أطَلع أي ورقة رسمية ... ساعتها بنتقد الروتين والحكومة .. إنت بتنتقد التفرقة العنصرية

وانا راكب عربيتي واحد بيطلع يسيبلي الدين ... مش بقول إنه قال كده عشان شاف مصحف في عربيتي .. بقول إنه ملقاش حد يربيه وإنه صايع

مش حقولك ده شعور بالإضطهاد .. مش حطلب منك أكتر من إنك تحط فالاخر إن ده رايك إنت بس ... مش رأي مسيحيين مصر

مش رأي صحابي اللي بدخل معاهم الكنيسة لما يبقى فيه عزاء حد منهم ... أو فرح حد منهم

مش رأي الناس اللي عاشوا مع بعد سنين في نفس البيت .. كل واحد فيهم عنده دين غير التاني

مش رأي الناس اللي عشت معاهم عمري كله في المدراسة ...

مش رأي البيوت الكتيرة اللي فيها اب وأم مسلمين وخال أو عم مسيحي ...

للاسف مقالتك ملهاش أي فايدة ...

لانها مبنية على قمتين غلط ... التعميم والشعور بالاضطهاد

كلنا عارفين إن مهنة المحامي مهنة فيه كتير قوي كذب وتحايل عالقانون ورشوة .... ينفع نقول {كل المحامين حرامية} {وكل المهندسين شرفاء}

إنت بتنتقد المتطرفين "اللي مش حقولك إنهم مش موجودين" بتنتقدهم بـاسلوب متطرف !!

على فكرة أنا مش بقول إنك غلط فكل كلامك ... بالعكس فيه حاجات أنا نفسي شايف إنها غلط وبزعل لما بحط نفسي مكانك , أهم حاجة إنك تبقى مؤثر ... تعرف توصل صوتك صح وتاخد حقك صح

لما يجي وقت زي ده كلنا لازم نقف فييه مع بعد ... وإنت تكتب كده تبقى غلطان .... لما للأسف تتريق على ايه من ايات القرآن تبقى غلطان .. زي اللي بيتريق عاللغة الصينية وهو مش فهمها ولا فاهم الناس دول بيقولوا إيه ..

فكَّر بـعقلك شوية .. اعرف إن مقالتك ديه تعمل فتنة أكتر من 20 أغنية عن الوحدة ... و 30 مقالة عن الوطنية

adel يقول...

عاشور
احنا في الهم سواء ياصديقي

بالمناسبة اسمي عادل صليب :)
وكل سنة وانتم طيبين

rana يقول...

انا بجد اسفة علي الكلام اللي انت كتبته وبجد مكنتش عايزة ارد بس غيرت رايي لان انا ليا اصدقاء مسيحين وليا واحدة معايا من ابتدائي لغاية الان والحمد لله اعز اصحاب انا دخلت بس علشان اقول ان مش كل المسيحيين زيك ومش كل المسلمين زي بيقولوا كلام زي ده كل حته فيها الوحش والحلو ومصر كلها بمسلميها ومسيحينها زعلوا علي الارهاب اللي حصل في اسكندريه وفرحنا بالوحدة اللي حصلت بعد الحادثة ووالله وحياه ديني اللي مش عجبك وحياه القران اللي بتألس عليه وحياه رسولي واهلي اللي بتتريق علي كلامهم وعادتهم ودينهم وقرانهم اني افدي حياتي كلها لمصر بمسيحيها قبل مسلمينها
ويبقي اني اقول حسبي الله ونعم الوكيل فيك وفي كل المسلمين اللي زيك اللي ميعرفوش دينهم وبيقوموا الناس وبيخلقوا الفتنة في مصر حسبي الله ونعم الوكيل

غير معرف يقول...

مقاله جميله تذكرت خلالها أننى كمسيحى علاقتى بأخوتى الملحدين أكثر عمقاً من إخوانى المسلمين

اسمحلى هنقل المقال إلى النوت بتاعتى على الفيسبوك وطبعاً سأذكر أنك الكاتب ولكن سأغير بعض الكلمات لتناسب المتدينيين أصدقائى والتى لا أعتقد أنها ستخل بالمعنى

أشكرك جزيلاً وختاماً أقول لك كلمه دائماً أقولها لأصدقائى الملحدين .. احنا فى الهم سوا وانتظروا ماذا سيفعل بكم المتأسلمين قريباً يا كفار

غير معرف يقول...

محمد عمرو و رانا

لا يا جماعة بيحصل كل يوم
عمرك ما دخلت امتحان شفوي و الدكتور قالك هديك كذا اسمك يبص بقرف و تطلع النتيجة اقل من الرقم دا لمجرد انك مسيحي

سامحني مش كل بيعامل وحش بس معظم الناس في حاجة مرة في قلبهم و هم بيتعاملوا معاك

عمر ماحد قالك شيل الصليب او الصورة اللي حاططها في عربيتك علشان الناس(علس فكرة لسة الجملة دي متقاللي النهاردة)

مش هنسي صاحبي و حبيبي اللي متربي معاه من حضانة لحد الكلية و اعرفو من اكتر من 17 سنة اجي في يوم اقعد انادي عليه يعمل نفسه مش سلمع لمجرد انا النهاردة عيجد القيامة و هو مش عايز يعيد عليا


نفسي في يوم ادخل كنيستي اصلي من غير ما احتاج لعسكري يحرسني (دا طبعا الاسم لكن هو بيعمل حاجة تانية)
طب في راي حضراتكم ليه مفيش حراسة علي الجوامع
طب لية مفيش جامع بسور و مفيش كنيسة من غير سور

مجرد انك تقول انه دا مش بيحصل انت كدا بتشارك معاهم
بيقول اعمال فردية و بعيجة عن الطائفية و غالبا واحد مختل عقليا و لما قدمت بقي واحد منتحر

و بعدين كلو بيقسم ان اليهود هم اللي ورا الاحداث دي لا و كمان ورا سمك القرش بتاع شرم مش بعيد كمان يكونو ورا صفر المونديال و المصيبة انهم عندهم الدليل علي كل الكلام دا

يا جماعة المفروض اني بكلم النخبة من المجتمع لما دا يكون راي النخبة دفن الراس في الرملة و نظرية المؤامرة و تعليق كل الغلط علي شماعة اليهود و الصهاينة سوري دا اكبر دليل علي مجتمع هش و فاضلو زلطة و يطلع بره

كلمة قالها نجيب محفوظ و جاب بيها من الاخر
"العقل الواعي هو القادر على احترام الفكرة.. حتى ولو لم يؤمن بها"

سوري مفيش في مصر عقل واعي كلو معشش في عنكبوت الا عدد اقل من 200 بني ادم و دي مصيبة

عاشور:لو قلتلك شكرا هتكون كفاية ؟

رنا أخرى يقول...

مش عارفه اقولك ايه والله
هو دا مش دليلك علشان تعيش فى مصر هو دليل انك مش عارف حاجه
واللى بتشتكى منه بتنفذه انت شخصيا فى كلامك
يعنى لا انت محترم ديانه الأخرين وانت بتتكلم
والا انت محترم قرآنهم والا انت محترم حاجه
والأدهى ان اللى حارقك ومعذبك انك مضطهد من ناس بيقولوا عليك كافر فى حين ان القرآن ده نفسه والله بيقول عليك اهل كتاب
"مِّنْ أَهْلِ الْكِتَابِ أُمَّةٌ قَائِمَةٌ يَتْلُونَ آيَاتِ اللَّهِ آنَاء اللَّيْلِ وَهُمْ يَسْجُدُونَ. يُؤْمِنُونَ بِاللَّهِ وَالْيَوْمِ الآخِرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ وَيُسَارِعُونَ فِي الْخَيْرَاتِ وَأُولَئِكَ مِنَ الصَّالِحِينَ"

ومش بس كدا كمان
وَلا تُجَادِلُوا أَهْلَ الْكِتَابِ إِلاَّ بِالَّتِي هِيَ أَحْسَنُ، إِلاَّ الَّذِينَ ظَلَمُوا مِنْهُمْ، وَقُولُوا آمَنَّا بِالَّذِي أُنزِلَ إِلَيْنَا وَأُنزِلَ إِلَيْكُمْ وَإِلَهُنَا وَإِلَهُكُمْ وَاحِدٌ، وَنَحْنُ لَهُ مُسْلِمُونَ

وقال في ذلك: "وَقَفَّيْنَا بِعِيسَى ابْنِ مَرْيَمَ، وَآتَيْنَاهُ الإِنجِيلَ، وَجَعَلْنَا فِي قُلُوبِ الَّذِينَ اتَّبَعُوهُ رَأْفَةً وَرَحْمَةً" (سورة الحديد 27).

وإعتبرهم القرآن أقرب الناس مودة إلى المسلمين:

وسجل ذك في سورة المائدة حيث يقول: "لَتَجِدَنَّ أَشَدَّ النَّاسِ عَدَاوَةً لِّلَّذِينَ آمَنُواْ الْيَهُودَ وَالَّذِينَ أَشْرَكُواْ وَلَتَجِدَنَّ أَقْرَبَهُمْ مَّوَدَّةً لِّلَّذِينَ آمَنُواْ الَّذِينَ قَالُواْ إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لاَ يَسْتَكْبِرُونَ"

دا مقتطفات سريعه
يمكن المسلمين برده فى ناس بتختلط عليها الامور وللاسف بيعملوا حاجات مش من دينهم فى شئ

بس مينفعش تروح تشتكى من حاجه انت نفسك أسير ليها
صفى ذهنك كدا وفكر ..
مشكلتنا فى جميع النواحى ان محدش فاهم حاجه لا المسلم فاهم دينه كويس ودا لان المتربحين من تريبه الدقون والقنوات الفضائيه والتفكير المتطرف مش سايبينه فى حاله
والا انت قادر تفهم ان الهم واحد وان اللى بيتمرمط فى البلد بيتمرمط عشان مصرى فقط مش عشان دينه
اما عن باقى المسيحين فانا معرفش حقيقه لانى عرفت مسيحين على قد ما عرفت فى حياتى بس ما فكرتش انى ادخل مع حد فى تفاصيل دينيه او علاقه من المفترض انها ربانيه خالصه لله وحده وكل واحد حر وحسابه فقط عند ربه
نفسي الناس تخرج من بيوتها تروح شغلها لشغلها او تروح تتعلم للعلم
مش تتلصص على حياة بعضها وتقرف فى بعضها
حاجه تحزن وتحرق الدم

رنا تانية يقول...

عارف دا مش دليلك علشان تعيش مسيحى فى مصر
دا دليلك انك مش عارف حاجه أصلا
والأدهى انك بتشتكى من حاجه انت نفسك بتطبقها وجاى تشتكى ومحروق يا عينى منها

يعنى انا افهم واحد زعلان من الكدابين مثلا ومحروق منهم ما يكدبش حتى لو كل اللى حواليه كدابين

بس واحد محروق من عدم احترام الاديان يجى وبكل خط عريض سمكه مش عارف كام وعشرين ويهزأ من معتقدات الأخرين اللى هو نفسه بيتهمهم بالفعل ذاته

زى ما واحد يشتمك تشتمه وتقول دا قليل الادب معلش ما انك عملت نفس الفعل مبقتش قليل الادب انت كمان ليه
والا هى تفرقه عنصريه

القرآن بيقول أهل كتااااااب اكيد عارف يعنى

عيبنا اننا للأسف فريسه وفريسه سهله اوى
للى عاملين نفسهم شيوخ واللى مربى لحيته واللى بيفتى باسم الدين وهو ولا فاهم حاجه اساسا
والفريسه حقها الوحيد بعد ما تفترس انها ترفص بس ودا اللى بيعمله الناس دلوقتى برفصوا بعض
ومش بس الشيوخ كمان اللى عاملين نفسهم اصحاب قضيه وهما اساسا اصحاب أكراش جشعه محتاجه فلووووووووس
مربط الفرس مش مسلم او مسيحى او دين يا استاذ
لا مربط الفرس فلووووووس وجشع

الدين دا علاقه ربانيه خالصه وكل واحد متعلق من عرقوبه

وبالمناسبه المتمرمط فى البلد دى متمرمط عشان مصري مش عشان مسلم او مسيحى

هات باسبور امريكى كدا وشوف والا خليك خليجى من بتوع العربيات الفارهه وبعدين تعالى ميز

حاجه تفلق وتحرق
آآآه يا بلد

the visitor يقول...

يا أخى

علشان تعيش فى الزمن اللى احنا عايشين فيه لازم تكون مسيحي و لا تكون مسلم و لا تكون عندك هوية أو شخصية من أساسه

إنما حاجتين فى كلامك غلط (لو تسمحلى)
1)التعميم و اسقاط كل حاجة تحصل على طائفية الدولة
2) السخرية من الاخر و من عقيدته أيا ماكان لأن ده اللى بيشعل نار الغضب و بيغذيها.


و عموما ربنا يصبر المصريين كلهم على ما بلاهم من نظام و تطرف و تعتيم

elmasryeffendi يقول...

اللعنة على الوهابيين المصريين و من اتوا بثقافات بالية متخلفة ادت لما نحن فيه، فبرغم الحادث مدبر من الخارج الا انه اكيد كان هناك دعم لوجستى من الداخل

أحمد مختار عاشور يقول...

أهلاً بكم..
................
في البداية أود أن أقول أني حجبت العديد من التعليقات التي لا تحوي إلا سباب.. وسمحت بكل التعليقات التي تحوي نقداً للمقال الذي كتبته وأنا ثائر..
(وأنا عندما أكون ثائر.. أكتب بصدق.. دون تذويق أو تجميل)
نأتي للرد على الانتقادات..
1
المسلم بيتعرض للإضطهاد برضه في البلد؟؟
طبعاً.. بس ده لو مسلم فقير بلا واسطة كحال معظم مسلمي مصر..
لكن المسيحي الفقير يتعرض للإضطهاد أكثر..
على الأقل بالنظرة.. ده لو فيه إحساس وإدراك بالآخر يعني..
2
بالنسبة لاحترام القرآن في مقالي هذا.. ربما يكون القصد عندما قلت عن آيات ذهب حكمها بلا رجعة كــ "يدفعوا الجزية عن يد وهم صاغرون..
سؤالي هنا: هل هنالك أحد يتمنى أن يعود حكم الجزية؟؟
إن كانت الإجابة بنعم.. فأنا أؤيد معاقبته قانونياً بتهمة الطائفية.. لذلك أرى أن معظم الحلول تتعلق في رقبة الدولة.. من فرض للقوانين وتغيير للدستور وخلافه..
3
الآيات القرآنية عن التسامح مع الآخر..
آيات جميلة.. وإن كان معظمها اتنسخ بآيات القتال.. لذلك للمتطرفون دينياً وجهة نظر أيضاً.. لذلك أنا سندي ودليلي هو الإنسانية.. تسألني ما دستور الإنسانية؟؟
سأخبرك أن الأديان كذلك يمكنها أن تجعلك تسلك يساراً أو يميناً وأنت مقتنع بأنك تطبق الدين..
الإنسانية واضحة لأي إنسان يمتلك أدنى قدر من الإحساس بالآخر..
4
الشعب المصري فقير وعيشته أصبحت مكدرة.. فأصبح الناس يستقوون على بعضهم البعض..
وهي تختلف بدرجات اجتماعية أو دينية وغيره..
نعم, أنا تحدثت بصورة مبالغة لأني أردت أن أوازن -أو أعادل تلك المبالغة السخيفة عن إننا اخوات وحبايب ومافيش فتنة وذلك الكذب الرجيم- ما كتبته حقيقي.. لا يفعله كل المسلمين.. لكن يفعله معظم المسلمين في مصر.. ولا أقول بعض..
من السذاجة إنك تقيس الوحدة الوطنية بالمكان اللي عايش فيه.. أنا متربي في الصعيد وعارف أنا بتكلم عن ايه كويس..
..............
في النهاية أتمنى من كل قلبي أن تنعكس الصورة القاتمة القائمة.. ونكون وطن حقيقي.. يستحق أن نفخر به..
تحياتي.

محمد الطناني يقول...

مش لاقي تعليق يا عاشور والله..
المصيبة انك بعد كل ده برضو تلاقي اللي بيعترض بشدة وقسوة تصل للسباب ولا كأنه مصدق ان ده بيحصل في مصر!!
كل واحد حر في رأيه طبعا ولكن القيم الانسانية المنتهكة في مصر اعتقد ان المفروض مايختلفش على انتهاكهااتنين!
للاسف احنا لسة بنعيش في مرحلة الانكار وعشان كدة الحوادث دي حتتكرر تاني وتالت وعاشر!

تحياتي واحترامي

احمد خليل يقول...

اللى يتكسف من بنت عمة ما يجبش منها عيال
فى هذة المرحلة التى تمر بها بلادنا ليس امامنا الا القول بصراحة حتى لو كانت بتوجع ...انت ذكرت بعض اشكال الاضطهاد الذى يعانى منها اخوتنا الاقباط وليس كل اشكالة..
ما لفت نظرى هو بعض التعليقات
يجب الا يفخر اى انسان بدينة يعنى عيب جدا واحد يفخر بان عنية خضراء او انة ابيض البشرة ،دى اشياء لا يد للانسان فيها ..وراثة، كذلك الدين والمذهب هو لم يختارهاولا فضل لة فيها
عجبتى جملة فى احد المدونات بتقول
"لما يا الله يقتل البشر بعضهم بعضا باسمك!!!

رنا الأخرى يقول...

حقيقه فى البدايه اقدم اعتذار فقد حدث خطأ ما عند ارسال الرد الاول فاضطررت الكتابه من جديد وعموما حصل خير

اما بالنسبه لرد حضرتك اسمحلى اعلق على كذا نقطه

----بس ده لو مسلم فقير بلا واسطة كحال معظم مسلمي مصر..
لكن المسيحي الفقير يتعرض للإضطهاد أكثر..
على الأقل بالنظرة.. ده لو فيه إحساس وإدراك بالآخر يعني..-----

يا سيدى الفاضل الراجل الفقير اللى بيتسول فى الشارع دا انا مش باشده من دراعه واقوله انت مسيحى والا مسلم عشان اديك صدقتك والا ايه ..هتقوللى اضطهاد بالنظرة معلش ما انا لو لابسه على قدى الناس كلها هتبصلى بصه مش تمام هو دا اضطهاد!! ولو لابسه نقاب ومعرفش ايه هيقابلنى اللى يقوللى بخ !! يبقى كدا انا مضطهده برده
وبعدين حضرتك بتقول فقير مضطهد اللى مش مضطهد فى البلد دى هو الغنى بس
يعنى بتوع الطبقه الوسطى تلت أرباع المجتمع دول هما كمان ممسوح بيهم البلاط فى كل حته فيكى يا بلد


أما بقى عن سؤالك بتاع الجزيه
فأولا الجزية لم تكن ابتداع من المسلمين
وكانت موجوده قبلهم فى الكتاب المقدس وليها تاريخ فى حياه الشعوب من قبل الاسلام
بل بالعكس الاسلام قننها وهتقوللى النهارده ومش النهارده اولا الجزيه كانت مقابل دفاع عن طائفه لا تشترك فى القتال ايام الاسلام الاولى وكانت مقابل الحمايه ومن بعدها اذا عجز المسلمون عن توفير الحمايه ترد لهم جزيتهم وكانت دينار تقريبا زى ما حصل فى عهد سيدنا عمر
المهم موقفها دلوقتى زى ما حضرتك عارف ان المسيحين بيشاركوا فى حمايه الوطن وبيدفعوا الضرايب اذا تسقط الجزية يبقى زمانه مراحش والا حاجه يافندم

ولو حضرتك بصيت بنفس النظرة دى لآيات القران كلها يبقى عليه العوض سورى يعنى

زى ما حضرتك بتقوللى ايات التسامح وآيات القتال
دا دليل على ان أصحاب اللحى والأكراش غلبوا على فكرك انت الأخر !!!!
فين روح القرآن فين الفهم المعتدل الصحيح
لاحظ كدا القرآن كله مفيهوش آيه تحث على القتال الا اذا كان دفاعا على حسب معلوماتى الضئيله اللى بحثت فيها قبل كدا ولولا ضيق وقتى كنت تعمقت
-----------
من السذاجة إنك تقيس الوحدة الوطنية بالمكان اللي عايش فيه.. أنا متربي في الصعيد وعارف أنا بتكلم عن ايه كويس..


العجيب انك انت نفسك فى نهايه كل جمله بتقولها بتقيس الوحده الوطنيه على المكان اللى انت عايش فيه !!!!!

هو عموما الخلاصه يعنى
فى فته ونفوس مش صافيه
آه فى بس فى ازاى وشكلها ايه اختلف معاك تماما فى اللى انت قايله

بس الفتنه الأكبر هى فتنه العقول الفاضيه واللى مفيهاش غير كل ما هو سفيه ومغلوط وللأسف دماغ الشعب كله ملعوب فيها
لا حد عارف سكه الصح والا نيله
وبجد كنت اتمنى الاقى مقال متفند ومليان أدله مش بس كلام مرسل

عموما تحياتى لحضرتك وسعدت بحوارك :)


________

غير معروف

مش هنسي صاحبي و حبيبي اللي متربي معاه من حضانة لحد الكلية و اعرفو من اكتر من 17 سنة اجي في يوم اقعد انادي عليه يعمل نفسه مش سلمع لمجرد انا النهاردة عيجد القيامة و هو مش عايز يعيد عليا


أشك انه صاحبك وحبيبك دا مصلحجى يافندم فى الأغلب يعنى
عموما
كل سنه وانتوا طيبــــن

مواطن علماني يقول...

عاشور، اكاد لا اصدق انه مازال هناك مفكرون عاقلون في هذه البلد امثال و امثال محمد الطناني و احمد خليل
انا مواطن مصري (ادين بالمسيحية منذ صغري) و يوجد علامة صليب على يدي احاول في الوقت الحالي عدم اظهارها قدر المستطاع

اعتقد ان دليلك هذا انا مشيت عليه بالفعل انفذ 90% منه قبل ان تصدره مع 90% من اصدقائي المسلمين الذي تربطني باغلبهم علاقة عمل بالاساس
انا اشعر بحبي لهم و لكن عندما ياتي الامر الى الدين اشعر اني مهما حدث لن يتخذ مني صديق فعلي بسبب ديني
رغم اني لا يكاد يشعر اني مسيحي الا عندما انطق باسمي و مع هذا فكثيرا ما كانت هناك طلبات من اصدقائي بأسلمتي بصورة ودثية مثل (عارف يا فلان انت شخص ممتاز فوق الوصف لكن لو تسلم)

و رغم كل هذا اعاني في بعض الاوقات ليست بالكثيرة بمحاولة تجنبي من المعاملة و بقول مش كتير بس موجودة و بتطلع من ناس من وقت للتاني

متابع جيد للشيوخ اكتر من القساوسة (اللي تقريبا مبقتش اسمعلهم) عشان اعرف اتاقلم بالنظام اللي يريح الناس اللي بقت مش وراها حاجة غير الشيوخ دي

عارف كويس جدا ان التشدد و التعصب في الاسلام بيتفاوت من شخص للتاني لكن المشكلة ان التشدد و التعصب بدأ يزيد لان الشيوخ بدأت تعلم الناس ان الحاجات دي جزء لا يتجزأ من الدين، و الاختلاف و التمييز مع غير المسلم واجب و بدأوا يخترعوا الاساليب اللي يخلي فعلا المسلم مختلف ابتداء من المظهر الخارجي

انا مش هقدر اقول اسمي نظرا لان الافكار دي مش هي اللي الناس عارفاها عني لكن انا واحد من الناس اللي حاولت تضيفك النهاردة

و الافكار دي انا مش بخبيها كنوع من الخوف لكن رغبة في استمرار علاقات اجتماعية سعيدة حتى ولو بالنفاق احد النصائح اللي انت قولتها

و الناس اللي بتقول ان الكلام ده مش موجود هو جايز يكون بالغ بنسبة بسيطة في بعض النقط لكنه موجود و كمثال بسيط ايه معنى ان الناس كل شوية تردد الاية
"ولن ترضى عنك اليهود و النصارى .."
و الشيوخ اللي كل شوية تقول لا تتخذ من النصارى اولياء لكم و متاخدش راي من نصراني و المصيبة ان دي الشيوخ اللي ليها شعبية حاليا
و ايه معنى ان شيخ صاحب شعبية يطلع يصرخ و يقول مبقتش عارف فرح المسلم من فرح النصراني

لك مني شكر في استفنفاذ وقتك في اشياء ممكن متكونش ليها نفع عليك بصورة مباشرة
و تقدير للمجهود الفكري اللي بتبذله

أحمد مختار عاشور يقول...

تحياتي لكل من علـَّق باحترام..
التعليق الأخير لــ "مواطن علماني" موجز ويحمل الخلاصة فعلاً..
الأستاذ أحمد خليل إنسان رائع..
وكذلك صديقي العزيز "محمد الطناني".. يمكنك معرفة رأيه هنا..
http://www.tanani.com/?p=31
خالص تحياتي.

SadJoy يقول...

ربما توجد بعض المبالغات في المقال لكن الأمر الواقع اسوأ بكثير..

عمال افكر في التعليقات اللي بتهاجم المقال وبتدعي ان مافيش اضطهاد لحد في مصر وهل أصحابها عايشين في بلد تانيه واللا هم مضللين او بيخادعوا انفسهم لعدم قدرتهم على مواحهة الواقع؟

افتكرت نفسي لما كنت في الثانوي كان لي صديق مسيحي اسمه يوسف كان برضه متضايق من شوية حاجات كده فقعد معايا مره وفتحلي قلبه وقعد يبعبع وكان بيقطر مراره وهو بيحكي عن المشاكل اللي بيواجهها هو واهله بشكل يومي , وما كان مني الا اني انبريت ادافع بمنتهى الحماس واسفه افكاره واتهمه بالضلال والتضليل والمغالطه والمبالغه الخ.. بالظبط زي الردود اللي قريتها هنا.. وخرجت من المناقشه دي باستنتاج ان يوسف عنده ربع ضارب في مخه

بس انا كنت في ثانوي.. يعني عذري اني كنت ساذج ومعنديش خبره!

بعد كده في الكليه بدأت اشوف حاجات ماكنتش شايفها قبل كده.. بدأت اشوف أشطر واحده فى الدفعه بتاخد بنصيحة الأساتذه "طيبي القلب" كتر خيرهم قالولها: يابنتي انتي شاطره وحرام تضيعي مستقبلك هنا.. احسنلك تحولي على الجامعه الأمريكيه وتشقي طريقك هناك لأن هنا مالكيش مكان (يقصدوا عمرك ماحتتعيني لما تشوفي حلمة ودنك)!
وفعلا عملت بنصيحتهم وحولت بعد ما خلصت السنه الأولى!
وشفت على مدار سنين الكليه وبعد التخرج قصص كتير مشابهه سببتلي انا شخصيا احباط وخلتني ناقم على اهل ملتي فمابالك بأصحابها المساكين اللي لبسوا في الحيط.. ياترى نقدر نلومهم لو كرهونا ولعنوا سنسفيل اللي خلفونا؟
وسؤالي للي بيقولوا ان كل شيء تمام.. هل لو انقلبت الآيه وكنتم انتم الأقليه اللي مضطره تسمع النكت السخيفه عليها وعلى مقدساتها بمناسبه ومن غير مناسبه والأوصاف من نوعية "كوفتس" و "عضمه زرقا" وخلافه , وكنتم بتتعاملوا كمواطن درجه تالته (لأن المسلم العادي هو اصلا مواطن درجه تانيه) وحاسين بالخوف على حياتكم وبالغربه في بلدكم.. كنتم لسه حاتشوفوا ان كل شيئ تمام وميت فل وعشره؟

مش غلط الإنسان يحاول يحط نفسه مكان غيره , بالعكس ده شيئ مهم ومطلوب جدا.. الإنسان الذكي على الأقل (مش حانقول المحترم) بيحاول يستكشف ظروف الناس اللي عايشين معاه لأنه عارف ان سعادته من سعادتهم وأمنه من أمنهم , واللا مطلوب تفجيرات اكتر من كده عشان نفوق؟

رنا يقول...

والله انا شايفه ان مطلوب حاجات تانيه عشان نفوق دا ردا على سؤال الاستاذ sadjoy
يافندم اللى انت بتتكلم فيه دا اسمه شخصنه وتضييق للمواقف والنظر لأمر عام من خلال خرم ابره
حضرتك عندنا اوائل الدفعات ومعيدين فى الكليه ومسيحيين محدش وقف فى سكتهم ولا خلاهم يدوروا على حلمه ودانهم والا حاجه رغم ان الزفته اللى انا فيها دى محدش سلم منها يعنى وطالع عنيين اللى فيها واحد واحد

هى فكرة واتفرضت مثلا ولازم نعترف انها موجوده علشان نبقى حلوين

ايوة فى تخلف وقرف مالى البلد من كل ناحيه
ايوة فى مسلمين مهببين الدنيا وفى مسيحيين مهببين الدنيا وفى مواقع بيتلعن فيها اللى جابونا كمسلمين وماليه الدنيا
ومواقع وقنوات مخصصه لده واهو موجود زى ما فى شيخ بيطلع وبعلو صوته يلعن ويسب ع اى حد مش مسلم

بس القرف الحقيقى لما يبقى كل اللى نقدر نعمله اننا نهلل وبس
فرضا ان فى فتنه وماذا بعد !!!!
هاقعد جنب الحيطه والف مع التيار لا هاحط صوره بروفايلى هلال وصليب لا هاصرخ بكلام فاضي اجوف
تصدقوا حاجه تفقع المرارة

اللى نفسه يصلح حقيقى مبيقفش عند الفاضيه والمليانه ماهى حابكه!!

فى ناس صوتها معتدل مالى البلد بس احنا مصريين ندفنه
اصل منطقنا الغريب كمصريين يفرض علينا التهليل وفضح اللى مش مفضوح عشان نطبق مبدأ المصارحه

زى ما فى مواقع مسيحيه سيئه ومتطرفه فى أخرى معتدله والعكس عند المسلمين
وبالمناسبه الايات اللى فى ردى السابق أخدتها من موقع الانبا تكلا ومن مقال محترم فاهم


اومال لو كان عندنا ملل اكتر من كدا كنا ولعنا فى البلد والا عملنا ايه

رحمتك يا رب

غاده شوقى يقول...

انا مش مع الكلام دا امال الامن عنال يقبض على كل الجماعات الاسلاميه والاخوان المسلمين ههه مش الاخوان المسيحين والاضطهاد اللى بتتكلم عليه شوف اى محل او شركه صاحبها مسيحى 99%من الموظفين بيكونوا اقباط عمرك شفت شغاله فى البيوت مسيحيه لانهم بيعرفوا يقفو جنب بعض قوى...والكلام اللى بيتقال على عدد الكنايس والجوامع انا حوليا 3 كنايس و4جوامع ولو بالنسبه والتناسب المسحين للمسامين6% ..يعنى المفروض كنيسه لكل 6 جوامع..احنا مطلوب مننا نصلى 5 مرات فى اليوم كل يوم دا غير السنن والنوافل عمرك شفت كنيسه فارشه قدمها والناس بتصلى فى الشارع ..انا نفسى نكون فييير شويه ..والله انا تحت البيت عندى سوبر ماركت لمسحين كل حاجه بيتى منهم مع ان فى نفس الشارع محل مشهور للجمله صحابه مسلمين ...بصوا الاضطهات دا شئ نابع من جوا الانسان والرك على النيه يا ريت اخوننا المسحين يصفوا النوايا ويحبوا اخوانهم المسلمين واحنا مش اعدائهم احنا مصرين زى بعض ولو مصر حصلها حاجه قننغرس فيها كلنا يا ريت نبطل كلام على بعض وكل واحد شايل للتانى سكينه ورا ضهرو ..ويا سيدى انا قبل ما اتحجب كان احيانا بيفتكرونى فى الكليه مسيحيه وكنت بسمع من المسيحين هما بيقولوا ايه على المسلمين وبيتريقوا عليهم ازاى صدقنى احمد زى الحاج احمد فبلاش نضحك على بعض وياريت نصفى نفوسنا علشان منشمتش العدو فينا

غاده شوقى يقول...

انا مش مع الكلام دا امال الامن عنال يقبض على كل الجماعات الاسلاميه والاخوان المسلمين ههه مش الاخوان المسيحين والاضطهاد اللى بتتكلم عليه شوف اى محل او شركه صاحبها مسيحى 99%من الموظفين بيكونوا اقباطعمرك شفت شغاله فى البيوت مسيحيه لانهم بيعرفوا يقفو جنب بعض قوى...الاضطهاد دا شئ نابع من الانسان من جوا وانا حوليا 3 كنايس و4 جوامع ولو للحق ...نسبه المسيحين للمسلمين6% يعنى كنيسه لكل 6جوامع ..عمركم شفتو كنيسه فارشه قدمها علشان معندهاش مكان مكفى للصلاه احنا عندنا 5صلوات فى اليوم الواحد ..يا جماعهبس شويه نظره موضوعيه ونصفى النوايا ...وانا قبل ما اتحجب كنت بقعد مع مسيحين وبسمع بيقولوا ايه على المسلمين ونفس النكت وهات يا تريقه وكنت بضحك...كانا زى بعض واحمد زى الحاج احمد ..بس فى الاخر كلنا فى الهوا سوا وبلاش نضحك حد علينا وانا شايفه ان اللىحصل فى الاسكندريه دا شئبشع وحقير ولن ابرر ان ديننا ما فهوش الكلام دا لان 7قرون تثبت ان الاسلام عاش مع المسيحيه بكل حب على عكس اليهوديه واننا عمرنا ما بصينا على المسيحين على انهم كفار ازاى كفار وسيدنا محمد اتجوز ماريا القبطيه ام ابنه ابراهيم..ونحن لا يكمل اسلامنا الا بان نؤمن بكل الرسل ومنهم سيدنا عيسى وعندنا سوره كامله فى القران باسم ستنا مريم ...ياريت كفايه كلام عن الاضطهاد ومنضحكش العدو فينا

السيد عباس يقول...

نحن نتنفس عنصرية منذ 1952
السبب فينا و في الحكام(العساكر)
لكن جرب أن تضع نفسك مكان الآخر المقتول و المضطهد بصراحة حاجة تقرف