محتوى المدونة لا يناسب من تقل أعمارهم عن 17 سنة !! (مش أنا اللي بقول)

OnePlusYou Quizzes and Widgets

Created by OnePlusYou - Free Dating Sites

سـِفـْرْ عـَاشـُوريات

03‏/07‏/2007

عاجل..........قبل أن يفصل النت

هو شاب عمره 30 عاماً , يتحصل على 450 جنيه فى الشهر....150 جنيه محصلة إشرافه على مركز نت من منتصف الليل حتى الثامنة
*****
أكتب إليكم هذا الكلام و هو على يساري جالس أمام الكومبيوتر واضعاُ سماعتين على أذنيه , يردد خلف المطرب
(اعتبره كلب و راح)

*****
ثم يهرول لعمله الحكومي المجاور لمركز النت فيجلس على كرسي بجوار شخص آخر فى نفس المكتب , يفطر , يثرثر , يمضى على بعض الأوراق حتى الساعة 14 مقابل 300 جنيه
*****
أكتب إليكم هذا الكلام و هو ينهض لمحاسبة زبون ولا ينسى أن يكتب نصف الحساب فى الدفتر كما علمه صاحب المركز كحيلة لتخفيف الضرائب و يخبر الزبون المتشكك بذلك بكل بساطة
*****
يرجع بيته يتناول غذاء ضعيف مع أمه و اخوه المخول برعايتهما كرب أسرة بعد وفاة والده , ينام حتى قبل ميعاد عمله الإضافي بساعة , ينهض و الناس تتأهب للنوم و قلبه مثقل بكآبة الاستيقاظ ليلاً , يستحم , يأكل أول ما يصطدم به فى الثلاجة , غالباً ما تكون خيارة , يخرج من بيته يشتري 8 سجائر فرط بجنيه.......4 فى السايبر
*****
أكتب إليكم هذا الكلام و أنا أناوله الولاعة , يشعل , (شكراً يا برنس)
*****
و 4 فى المصلحة (المرتب لما باخده بديه لامى و باخد منها 2 جنيه فى اليوم أنا مبصرفش على نفسى أكتر من جنيهين فى اليوم....الأول للسجائر و التاني ل 3 سندوتشات فول للفطار)
*****
أكتب إليكم هذا الكلام و أنا أخبره إنى هموت على كباية شاي
*****
الشاي مبحبوش , و العجلة مريحياني فى المواصلات , أنا ليا أخ فى ثانوي قلتله هدبحك لو مدخلتش طب
*****
أكتب إليكم هذا الكلام و هو يسألني (هي طب سهلة يعني؟...أنا شايفك - لامؤاخذة - صايع)
*****
أنا مش حارمه من حاجة فى الدروس و بحرم نفسي من حاجات كتير أنا و أمي الكفيفة عشانه
*****
أكتب إليكم هذا الكلام و هو جالس بجواري يشاهد - كعادته اليومية - فيلم سكس
*****
حتى قزازة الببس بتكون نفسي فيها بس بقول حرام , إنت عارف إن الببس أصلاً حرام شرعاً , أيوة أمال إيه , ده فيه دهن الخنازير وليعاذ بالله
*****
أكتب إليكم هذا الكلام و هو يوقف الفيلم و يفرش سجادة الصلاة المهترئة فى الحيز الضيق عند مدخل المركز حتى لا يستغفله أحد و يهرب بدون دفع أثناء صلاته للفجر
*****
أنا مستحيل أعرف أتجوز من مرتبي غير إني أصلاً معنديش وقت أنقي..بقولك أمي عميا يعنى مبتشوفش يعنى لو قولتلها نقيلى عروسة يا أما مش بعيد تجيبلي خالتي (يضحك)..من الآخر كدة أنا حاسبها كويس أخويا هو اللي هيجوزني على بال ما يخلص سنين الطب و الجيش و يعمله قرشين حلوين...هتجوز.....و حاسبها بالظبط....على 45 سنة
*****
أكتب إليكم هذا الكلام و أنا أتأمل فى عيني مجاوري على اليمين بنظرة ساخرة شاخرة أبرع فى إلقائها ربما تستطيع عيناي أن تأخذ بصره بعيداً عن شاشتي
*****
ديه مراتي هتشوف مني أحلى شغل ياااااااه بس تيجي بت الجزمة الأول (يضحك بشدة فأضحك على ضحكته) و مين عارف يمكن على بال ما أوصل السن ديه أكون نسيت يعنى إيه (..........)
*****
أكتب إليكم هذا الكلام و هو يعاود مشاهدة الفيلم ثانية مرددا "توب علينا يا رب"
يده اليمنى يزيل بها ذرات التراب الملتصقة بجبهته من أثر السجود بينما اليسرى مستكينة على حجره

*****
مأساة هذا الشاب الوحيدة هي عدم اكتشافه لمأساته
*****
أكتب إليكم هذا الكلام قبل أن يفصل النت
ليته فعل!!!

هناك تعليقان (2):

غير معرف يقول...

بجد,,,دي حلوة اويييي....
فاطمة

رحلتنا في الحياة يقول...

اول مرة تقريبا ازور المدونة
اسلوبك حلو جدا على الرغم انك دايما فى اغلب قصصك او اللى قريته لغاية دلوقتى شايف اغلب الناس واخدة الدين مظهر وبس
وده حقيقى
بطل القصة دى فيه زه كتير نفسه يكون كويس بس الظروف والحياة بتخليه يبقى عنده ازوداجية