محتوى المدونة لا يناسب من تقل أعمارهم عن 17 سنة !! (مش أنا اللي بقول)

OnePlusYou Quizzes and Widgets

Created by OnePlusYou - Free Dating Sites

سـِفـْرْ عـَاشـُوريات

07‏/05‏/2010

يعني ايه فيسبوك؟


ع الفيسبوك
1
عرفت ناس وهمية ..
ولما قابلتهم ..

طلعوا كدة فعلاً !
2
حضنت الفرحة ونمت ..
صحيت من غيرها ..
قمت عملت ريفريش ..
لقيتها في بروفايلها !
3
مؤمنين عاملين ملحدين ..
ملحدين عاملين مؤمنين ..
لكن اللي شفته كتير كانوا ..
حيوانات .. عاملين بني آدميين !
.............

.................
يعني ايه فيسبوك؟
..............

..................
يعني تقعد تتناقش بالساعات والأيام ..

وفي الآخر كل الكلام ده يروح في الهوا وماحدش بيتغير
..............
يعني ايه فيسبوك؟
...............
يعني لما واحدة تتعلم الطبيخ وتيجي تدوق أكلها وتلاقيه حلو أوي تجري ع الفيسبوك وتكتب ستاتس : أنا فظييييييييييييييعة!

والمطلوب منك إنك تستنج سر الفظاعة
................
يعني ايه فيسبوك؟
................
يعني إنك تعيش فيها شوية وتحس بقيمتك ..
اللي يضايقك تعمله دليت وبلوك .. وكدة بقى مش موجود .
اللي يكتب كومنت سخيف .. أمسحه بالكومنت على طول .
اللي بيستظرف أو اللي مش نازلك من زور دخله النار بتاعتك وأطرده من قائمتك .
.................
يعني ايه فيسبوك؟؟
.................
يعني إنك تكتب ستاتس .. وتبص عليها كدة من بعيد وتقول "ايه يا واد العبقرية ديه" ..
تروح عامل لايك!
..................
يعني ايه فيسبوك؟
.................
يعني إنك تعرفنا تقريرك اليومي لشخصك المبجل ..
"أنا قررت استحمى النهاردة يا جماعة" !
.................
يعني ايه فيسبوك؟؟
.................
يعني شباب فاضي فاكر إنه مكافح ..
شباب عاطل فاكر نفسه مثقف ..
شباب مالوش لازمة .. بقالهم لازمة ..
.................
يعني ايه فيسبوك؟
..................
يعني إنك لما تحس إنك سخيف وفي نفس الوقت صادق مع نفسك .. تروح تفكر تعمل ريبورت للأكونت بتاعك!

.................

يعني ايه فيسبوك؟

.................

يعني إنك لما تعمل صفحة وتنجح .. تلاقي 5 مليون صفحة طلعت زيها بتقلدها ..
وكل واحد حسب فكره ..
عندك على سبيل المثال .. صفحة "بس يا سيدي وقامت معيطة" ..
قامت فتاة .. بتحويلها "بس يا سيدي وقام معيط" ..
ثم قام إسلامي بتحويلها لــ "بس يا سيدي وقام مصلي ركعتين"
ثم ظهر رد فعل عبثي رائع .. "بس يا سيدي وقام عمل ريبورت للصفحة"
...................

يعني ايه فيسبوك؟

...................

يعني إنك لما تحب تشتغل في البشر تعمل صفحة يتيمة سب في الله أو الأديان ..
عشان تلاقي 5000 أهطل عمل مليون صفحة للرد عليها !
والأظرف أن تجد كل كارهي الصفحة يدخلوها ليطلبوا من الآخرين الخروج منها !
..................
يعني ايه فيسبوك؟
.................
يعني سبوبة لناس وشهرة لناس وبيزنس لناس ..
بكرة حفلة توقيع كتابي "كيف تضاجع سيد قشطة"
بكرة هطلع على إذاعة مدغشقر الرسمية .. اسمعوني !
.................
يعني ايه فيسبوك؟
.................
يعني مولد وصاحبه غايب ..
يعني ناس بتتريق ع الدين ..
وناس بتدافع عنه ..
ناس عايزة تحرق الفقرا ..
وناس عايزة تغتصب الأغنيا ..
ناس بتشجع الأهلي ..
وناس ملهاش في الكورة ..
ناس بتعبد عمرو دياب ..
وناس بتسجد لتامر حسني ..
..................
يعني ايه فيسبوك؟
.................
يعني ملتقى المرضى النفسيين في كل مكان !
.................
يعني ايه فيسبوك؟
...................
يعني إنك لما تقبل صداقة حد ييجي يكتبلك ع الوول شكراً ع الإضافة !
يعني حد يضيف واحدة ولما تسأله عن سبب الإضافة يقولها أصلي افتكرتك سِنجِل !
يعني -إنت كشخص بياناتك واضحة- لما تقبل صداقة بروفايل وهمي , ييجي بعدها يسألك إنت مين؟
...................
يعني ايه فيسبوك؟
................
يعني انك تكتب نوت وتنام ..
تصحى تلاقي ناس شغالة بتشتم بعض في التعليقات !
(يلا يا حبيبي انت وهو .. كله على بروفايله .. هنرش مية)
................
يعني ايه فيسبوك؟
...............
يعني هبل طبعاً
..............
يعني ايه فيسبوك؟
يعني علاقات , حب , خطوبة , علاقة مفتوحة , جواز ..
يعني إنك تكون مرتبط باتنين على بروفايلين ..
يعني انك تكون مرتبط بشخصية وهمية ..
يعني لما الناس كلها تيجي تباركلك العلاقة الجديدة في التعليقات .. ومن ورا ضهرك .......
يعني الناس تقولّك العلاقة ديه هايلة ولما تلغيها .. نفس الناس يقولوا معلش إنت أحسن برضه ..
يعني لما تخلي جوز أختك يشيل علاقة الزواج بأختك ع الفيسبوك ويدخل معاك أنت في علاقة ..
(هو كدة جوازه بأختك بطل؟)
(هو كدة بقيتوا شواذ؟)
.................
يعني ايه فيسبوك؟
.................
يعني لما الفضا يجيب آخره معاك تروح مألف شخصية وهمية أكثر جرأة من شخصيتك الحقيقية عشان تأكد على كلامك ..
يعني لما الجنان يجيب آخره معاك تروح مألف شخصية وهمية ضد أفكارك تماماً ولا بأس لو تعاركت مع شخصيتك هذه في تعليقات بالسباب رايح جاي .. أمام الجميع !
..................
يعني ايه فيسبوك؟
.................

يعني الناس تبطل تعترض على أفكارك ..

لغاية ما تكتشف -بعد ما أكونتك يتقفل- إنهم كانوا بيعملوا ريبورتات للأكونت بتاعك في صمت وإخلاص!

................
يعني ايه فيسبوك؟

...................

يعني تظبيط بنات ..
بتحبي مين من المطربين؟
انتي عارفة إنك فيكي كتير مني !
انتي حبيتي قبل كدة؟
أنا معطلك عن حاجة؟
..................
يعني ايه فيسبوك؟
................
يعني البنت تبدأ تحط صورتها لما يفوتها قطر الجواز .
................
يعني ايه فيسبوك؟
................
يعني واحدة تيجي تقول : أنا هنتحر يا جماعة !
وكله ييجي يهدي فيها عشان تعقل
ماعدا حد بحترمه جداً ممكن يكتب : هتوحشينا !
................

يعني ايه فيسبوك؟

..............

يعني حد يكتب ستاتس : والدي توفى اليوم!

ويروح ييجي واحد يعمل لايك !

................
يعني ايه فيسبوك؟
................
يعني إنك تحط لينك من ساعة لتجد عليه تعليق من 10 ساعات !
يعني إنك تحط لينك من ساعتين لتجد بعض التعليقات اختفت من عليه ..
يعني إنك تحط لينك من 3 ساعات لتجد بعدها الأكونت بتاعك اتقفل ..
يعني إنك تبعتلهم رسالة عشان يرجعوا الأكونت من 4 ساعات فيطلبوا منك إنك تصور البطاقة أو رخصة العربية وتبعتهالهم عشان يتأكدوا إنك أنت أنت ..
يعني إنك لما تبعت اللي عايزينه من 5 ساعات يفضلوا يبعتولك نفس طلبهم بكل آلية ..
يعني إنك بعد 6 ساعات تظبط نفسك عشان تعمل أكونت جديد ..
..................
يعني ايه فيسبوك؟
.................
يعني إنك تلاقي الملحد بقى مؤمن ..
المؤمن بقى ملحد ..
المسلم بقى مسيحي ..
المسيحي بقى مسلم ..
يعني إنك تلاقي الملحد اللي بقى مؤمن رجع ملحد تاني !
والمسلم يقلب يهودي !
والمسيحي يرجع بوذي !
..................
يعني ايه فيسبوك؟
..............
يعني إنك لما تكتشف إن اللي قارفك في عيشتك بتعليقات خنيقة ممكن يطلع ..

أخوك .
أو صاحبك .
أو إنت نفسك !
.............
يعني ايه فيسبوك؟
..............
يعني جوز خالتك يطلع عمتك !
..............
يعني ايه فيسبوك؟
.............
يعني إنك تحس إن اللي حواليك كلهم متنورين , معارضين , مثقفين !
تطلع للشارع تلاقي عكس الكلام ده ..

وغالباً العكس ده بييجي من نفس مثقفي الفيسبوك !
مع تحيات الفصام .
............
يعني ايه فيسبوك؟
............
يعني إنك تحب فتاة لأيام وشهور ولو متخلف عقلياً ممكن نقول سنين كمان !
ترفض لقائك لأنها محترمة .
تضع لها صوراً كثيرة لتؤكد على شخصيتها
أو ترفض أن تريك صورتها لأنها محترمة !
وترفض أن تعطيك رقم المحمول لأنها محترمة !
وفي الآخر تطلع واحد صاحبك بيشتغلك اشتغالة محترمة !
.............
.............
أقول هذا الكلام لأني يؤسفني أن أخبركم إني طلعت شخصية وهمية يا جماعة .. وده بعد ما عملت تحليل للأسف ..
ومن ساعتها وأنا مش عارف أعمل إيه ولا أروح فين ..
"جئت لا أعلم من أي أكونت لكني أتيت"..
:(

هناك 22 تعليقًا:

9h يقول...
أزال المؤلف هذا التعليق.
بر و ماء يقول...

لا اجد تعليق يليق بهذه التدوينه الا
صدقت فى كل كلمه!

مجد الدين يقول...

رائعة بكل بساطة رائعة

وبدون نفاق هههه

د / داليا يقول...

السلام عليكم و رحمة الله و بركاته

حقيقى رائع ما سطرت

أحييك على مصداقيتك

ليس هذا لأنى لست من أنصار الفيس بوك

و لكن لأن هذا رأيى بالفعل

سلمت أناملك

أرق تحياتى

غير معرف يقول...

كنت فين من زمان

بِنت نُكتة يقول...

على فكرة انت فعلا معاك حق في معظم اللي قولته
بس انا عاوزة اقول ان كل حاجة في الدنيا سلاح ذو حدين..وانت بشخصيتك وبثقافتك بتحدد حتستخدم انهي حد فيهم

يعني مثلا جروبات زي معلومة ع السريع ومما قرأت وكل يوم مقولة في النجاح..ماحدش يقدر ينكر ان ليهم دور ايجابي وثقافي وفرقوا مع ناس كتير..
لما يكون في جروبات عن كليات معينة بينزلوا فيها شرح محاضرات وحل نسائل وملت صوتية..وصور عملي وكل حاجة عن الكلية..بنحتاس فيها

اكيد طبعا هنا الصورة عن الفيس بتختلف

بس عموما اتفق معاك في كتير من اللي قولته من غير ما أغفل عن الجانب الإيجابي

dr.lecter يقول...

انت ابن لذيينه

جامده فشخ يااحمد بجد انت قلت اللي فيها

غير معرف يقول...

طيب قدرت اتحدد شخصيتك الوهمية هناك ولا لأ ..
في يتبع :( ولا لأ ..ههههه

خليتني أشك بنفسي !!
وأهنيك خليتني أفكر !
سبحان الله
:)
وما بعرف أنا استفدت منه كتير ما بحب أصرح بهذا الشي لانه مش ناقصني انه هيك شوية تريقه بس جد لانه عرفني على كتير أذواق ونفسيات لناس لانه هاد الموقع الأهبل جمع الجميع ...واشيا اخرى

anasism يقول...

تحفه بجد
وحسستني بجد بالهبل الي عيشينه علي الفيسبوك

تحياتي يا جامد
انس

Unknown يقول...

Like :)

غير معرف يقول...

مع الاحترام والاقرار بما كتبت ولكنك قد استرسلت قى كشف عوارات الفيس بوك وانت شخصياً جزء منه ولم تذكر له حسنه واحده وهى على سبيل المثال على كثره مدعى الثقافه فيه فهو ملئ بالمثقفين الحقيقين واصحاب الفكر الحقيقين وانت احد هؤلاء فانت تملك قلم جيد ياعزيزى ان الفيس بوك رغم كل ذلك الا انه اصبح متنفس صحى للكثيرين للمناقشه وتبادل الاراء والترفيه فى نفس الوقت

Dr. Eyad Harfoush يقول...

أوافقك تماما وأهنيك على التدوينة الرائعة بحق، بس السؤال، هي الامراض دي في الفيسبوك ولا فينا. يعني هل كل ده موجود في المجتمع ولا لأ؟ هحاول أجاوب على سؤالي وانت كمان يا ريت تحاول ونتشاور
تحياتي وتقديري وشكري لمتعة القراءة

أحمد مختار عاشور يقول...

أشكرك غادة, بر وماء , مجد الدين , د. داليا , د. ليكتر , أنس , محمود بلال
.....
فوشيا , أسامة عبدالعال
بالطبع أوافقكما أنها رؤية ساخرة قد تكون مبالغ فيها وأغفلت فيها عن المميزات .. فالمميزات موجودة بالطبع وإلا ما كنا تركنا الفيسبوك!
.......
د. إياد حرفوش
مشرفني دايماً يا دكتور
وكونك تصل بمقال بسيط كهذا إلى مفهوم أعم عن التناقضات التي بداخلنا قبل أن نعكسها على الأنترنت وعلى إحدى المواقع الاجتماعية خصيصاً .. فتلك قراءة منك احترمها كثيراً من عقل واعٍ
تحياتي يا دكتور
......
تحياتي لجميع الأصدقاء

TheOneWhoMayCareOrNot يقول...

لأن ببساطه هو ده عالم الكمبيوتر و الموبايلات و التكنولوجيا .... هو المكان الوحيد ال بتخلق فيه بالرغم من انك مجرد مخلوق ..... ما هو فى الأول و الأخر عالم وهمى أو تقدر نقول
second life 4 no life
و عجبببببىىىى

Mo7Zone يقول...

هههههههههههههههه شديدة اوي و انا عايز اضيفك ع الفيس بوك :D

غير معرف يقول...

أكثر من رائعة ولوحة معبرة لما يحدث من جميع الجوانب

آخر أيام الخريف يقول...

روعة .. بجد روعة ...

يا ريت لو عندك وقت تشرفنى فى مدونتى الصغننة

http://reeeshkalam.blogspot.com/

غير معرف يقول...

معك حق في كل ما قلته
مع تحياتي

غير معرف يقول...

http://www.facebook.com/home.php?#!/photo.php?pid=186205&id=100001042367659&ref=notif&notif_t=photo_reply

انتهاك للملكيه الفكريه

غير معرف يقول...

جامده بس ياتراء بصتلها من بعيد وعملتلها لايك

غير معرف يقول...

الفيس بوك الى كله سلبيات ده من وجهة نظرك عمل حاجة محدش قدار يعملها اعظم ثورة فى التاريخ وقدر شباب الفيس بوك على تغير الفكرة السيىء عنهم

Fahema Mahmoud يقول...

ماشاء الله شربااااات